خلاص الشهر قرّب يخلص، ومهم جداً إننا نبدأ نقيّم نفسنا على الميزان، اللي وزنه زاد يلحق بسرعة ويرجع للريجيم.. واللي فعلاً خسر وزنه يحافظ عليه من كحك وغريبة العيد.
الموضوع محتاج كنترول شوية… لكن إزاي نسيطر على نفسنا، وخاصة إن العيد كله عزومات والكل بيهني بعض وبيهادوا بعض بالكحك والغريبة والبتيفور والشكلمة و….. و…..
يا ريت يا دكتور “محمد” تقول لنا هنعمل إيه؟
على الرغم من محاولاتنا الدائمة وتحذيرنا الدائم من الزيادة في الوزن في رمضان؛ فإن البعض -ومع الأسف- بيخرج من رمضان وزنه أكثر من الأول؛ يعني بدل ما يخس 2 أو 3 كيلو بيزيد أربعة كيلو أو أكثر.
وفيه ناس بتنتبه إنها زادت من نصف رمضان، وإنها فقدت السيطرة على الوزن، وتنتهز فرصة الأيام المتبقية من رمضان وتعمل ريجيم قبل العيد علشان الوضع ما يتأزمش كثيراً بسبب الزيادة، وتثبت وزنها في أيام العيد، وبعد كده تواصل في الريجيم بطاقة أعلى.
وفيه ناس تجاهلوا كل النصايح والريجيمات، وأكلوا ولخبطوا في الأكل، ومع الأسف هيواصلوا اللخبطة في العيد، ومع الأسف بيزيد وزنهم جداً، ومن الحاجات اللي ممكن تضايق كل الناس اللي أهملت الكنترول على الوزن إنهم قد يكونوا بالفعل اشتروا لبس العيد من بدري، وييجي العيد ويكتشفوا إنه من الصعب بل من المستحيل إنهم يلبسوه؛ لأن وزنهم زاد جداً في فترة قصيرة جداً؛ لأنهم كانوا مركزين جداً في الأكل والحلويات من الفطار وحتى السحور… وطبعاً النتيجة هتبقى صدمة بالنسبة لهم، وهيبدأوا ريجيم من أوّل وجديد.
والكحك هنعمل فيه إيه؟
طبعاً من الصعب جداً نقول بلاش ناكل كحك في العيد.. لكن نحاول على قد ما نقدر نقلل من الخسائر شوية؛ بمعنى نشتري كميات قليلة من الكحك كيلو واحد كفاية أو على قدّ أيام العيد الثلاثة.
يعني فيه ناس بتجيب كميات هائلة من الكحك والغريبة والبتيفور لدرجة إنها ممكن تقعد في البيت ثلاثة شهور مش ثلاثة أيام، وطبعاً دي كلها مغريات بتضغط على الشخص اللي بيعمل ريجيم فيضطر إنه يلخبط وياكل من الحاجات الحلوة اللي قدامه.
ومهم جداً علشان نعمل كنترول على نفسنا في العيد وناكل بالمعقول من حلويات العيد، إننا نعرف إن الكحكة السادة الواحدة بتحتوي على 300 سعر حراري، وفيه أنواع من الكحك ممكن تحتوي على 500 سعر لو كانت معمولة بسمنة أكتر أو بالمكسرات أو العجوة على حسب مكوناتها.
وعلشان نحرق 200 سعر لازم نمشي على الأقل ساعة ونص؛ فما بالكم لو أكلنا طبق كحك في الصبح مع الشاي، وحلينا بعد الغدا بكحكتين، وبالليل لو زرنا حد ويعزم علينا “معقول مش هتدوق الكحك اللي أنا عاملاه ده خفيف خالص والله بالعجمية!!!”… فناكل كحك كمان وكمان!!
طب وإيه الحل مع كل هذا الكم من السعرات الحرارية؟
تخيّلوا حجم السعرات الحرارية الداخلة للجسم قد إيه، وتخيّلوا هنكون محتاجين نبذل مجهود أد إيه علشان نحرق كل السعرات اللي هتتحوّل سريعاً إلى دهون في الجسم.
ونصيحتي إن الاستعداد للعيد لازم يكون بدون إسراف، يعني نجيب كيلو، ولما يخلص نجيب كيلو كمان، ونهادي من الكميات الموجودة في البيت الأهل والجيران والفقراء، المهم بلاش الكحك يقعد كتير عندنا.
ومن الحاجات اللي ممكن السنة دي تكون إيجابية إن العيد في الصيف، وفيه ناس كتير هتقضي الإجازة على البحر، وفي السفر والحركة واللعب؛ سواء كرة أو سباحة أو جري أو ركوب عجل؛ كل واحد طبعاً على قد إمكانياته. في الفترة دي ممكن نحرق سعرات حرارية هتساعد على تثبيت الوزن نوعاً ما أو حتى لو فيه زيادة هتكون بنسبة قليلة.
البعض بيحب ياكل سمك في العيد وخاصة السمك المملح زي “الرنجة”.. هل ده ممكن يزوّد الوزن؟
السمك في حد ذاته مش بيتخن وحلو للريجيم، وخاصة إننا طول رمضان بناكل لحوم حمراء، وأكيد الأسماك هتكون أخف بعد لخبطة رمضان. المشكلة في الحاجات اللي بناكلها مع السمك: المخلل والطحينة والأرز… دي حاجات بتزوّد السعرات الحرارية.
بالنسبة للرنجة مشكلتها في الملح اللي بيحوّش مية في الجسم، وبيخلّي الواحد زايد على الميزان، ودي مشكلة وقتية وحلها إننا نشرب مية كتير؛ لأن المية بتخرّج الملح، ولما بنفقد المية المحبوسة في الجسم بنلاقي الوزن السابق رجع تاني؛ بمعنى إن اللي وزنه زاد بعد أكل الرنجة ما يقلقش أبداً؛ لأنه هيفقدهم بسرعة.
هل فيه أدوية بتساعد على تخليص الجسم من المية الزايدة؟
طبعاً فيه؛ ولكن لازم تكون تحت إشراف الطبيب؛ لأن تناولها بشكل خاطئ ممكن يؤذي جداً الكلى أو يعمل هبوط مفاجئ، وتناول مدرات البول له شروط خاصة.
ممكن يا دكتور تقول نصيحة لكل اللي تخنوا في رمضان؟
نصيحتي إن اللي وزنه زاد في رمضان يعمل ريجيم بسرعة علشان الزيادة لا تتضاعف؛ لأن الثلاثة كيلو ممكن يجرّوا ثلاثة كيلو كمان، وهكذا، في حين لو عملنا ريجيم أسبوعين بعد العيد ممكن نخسرهم بسرعة.. ولكن المهم يكون عندنا إرادة قوية.
في انتطار جديدك دائما
تحيتي