كيفكم ياأحلى صبايا واحلى أعضاء..
اليوم بدي اقولكم عن طريقة عمل الرومانية
اول شي بتجيبي اللحمة وبتقطعيها صغير يعني قد عقلة الاصبع وبتعملي تحتها بصلة بتكوني شوحتيها اصلا بالزيت وبتخلي اللحمة هيك لتستوي..
بتكوني بهذا الوقت محضرة وقية عدس بني وسلقاه ..
وكمان بتكوني محضرة الدقة اللي هي 5 فصوص ثوم كبار يعني وفلفل اخضر واحد وجرادة ناشفة وبدقيهم كويس وبتخلي كل هاي الشغلات عجنب..
بتجيبي باذنجان 2 حبة يعني كبار شوي يكونوا وبتقطعيهم مكعبات وبتقومي باضافتهم فوق اللحمة بتحسي هيك ذبل شوي واستوى بتقومي بتضيفي العدس البني المستوي وكمان الدقة اللي جهزتيها..
بتحسيهم عبعض استوا بتقومي باضافة عصير الرمان طبعا بتكوني جايبة كيلو ونص وماخذة حب الرمان وعصراه عالخلاط ..حلوين..
بس تضيفي الرمان بتخليهم هيك شوي مع بعض حتى تحسيه هيك اتسبك مع بعضه وبتصيري تذوقي حموضته وملحه ..
وبتضيفي شوية طحين يعني ليصير القوام متل المهلبية طبعا كل هذا وانتي بتذوقي الحموضة والملوحة يعني احيانا بكون الرمان كتير حاذق فما بنضيفه كله بنضيف شوي شوي وبنشوف بدل ما ضلي تحطي بالاخر مي..
المهم هيك اكلتنا استوت وصارت مية مية بتروحي بتجيبي قولي 5 بصلات وبتقطعيهم شرائح وبتشوحيهم بزيت زيتون وبعدين بتحطيهم فوق طبختك ..وبتتاكل بالخبز وخاصة البلدي ازكى شي. _
والف صحة وهنا على قلبكم
جربوها ما راح تخسروا كتييييييييييييييير زاكية..
في انتظار وصفاتك الحلوة دوما
تحاياي