نص قصيدة من واقع دفتر هشام الجخ والرد علي هذه القصيده قصيدة "أنا إخوان " 2024.

نص قصيدة (أنا إخوان) من واقع دفتر هشام الجخ

أنا إخوان ..
أنا إخوان .. وكل المسلمين إخوان …
فما تصنّـفش إسلامي على كيفَك ..
حقيقتي أقوى من زيفك ..
وصابعي لوحده بكفوفك ..
ولا اتهزّش قصاد خوفك …. يا خوف يا جبان ..
أنا إخوان .. باطيع الله في ملكوته ..
وبادعي يزيدني من فضله ومن قوته .. واصلي واصوم ..
واجاهد نفسي واصبر ع البلا واحمد .. وحمدي يدوم ..
لأنه الرازق الوهّاب ..
وهو مسبّب الأسباب .. فليه الفضل والمنّة .. وليه الطاعة ..
فما تبصّش لديني نظرة طماعة ..
أنا ديني لا هو سلعة ولا بضاعة .. ولا ليه سوق ..
لا انا بايع ولا شاري .. إيماني هو راسمالي .. فإصحى وفوق..
مانيش إخوان على نهجك .. فلمّ من الدروب وهجك .. كفاية شقوق ..
مش انت لوحدك الإخوان .. أنا إخوان .. على السُنّة وع القرآن ..
وقت الجَدْب .. انا عثمان ..
ووقت الحرب .. انا حمزة ..
ووقت الفصل ببقى فاروق ..
أنا إخوان على التقوى .. وع الرحمة .. وحب الناس ..
لكن عمري ما حتأخون بأخونتك على الصندوق.

عنيكم فيها كل النور ومش شايفة ..
غباوة انك تهدد ناس ماهيش خايفة ..
بتهدّد في مين يا حزين ؟؟ ده انا الآه اللي طلقوني ..
وجيعة وسارحة في الشارع ومش ممكن حتخفوني ..
حتسمعني ..
وغصبٍ عن عنيك الجوز على دماغك حترفعني ..
أنا الناس اللي عاشت تحت خط الفقر ..
وانا الناس اللي ماتت مالتقتش القبر ..
فسيبك م اللي بيجاملك وبيهيّص ..
وتفضالي وتسمع كلمتي كويّس ..
أنا الثورة اللي عملت منك الريّس.

أنا اللي يا دوب من سنتين كنا بنِـتْحبس صُحبة ..
وكنا بنتجلد صحبة ..
وكنا في الميدان صحبة ..
بتبعد ليه ؟؟ وتكتب ع الطريق غربة ..
بتمشي في الطريق وحدك ليه مهمّلني ؟؟
ما لو صعبة عليك الشيلة حمّلني ..
حتلقاني بعارضك آه .. لكني وراك ..
بجدّف في السفينة معاك ..
أكون وِدْنك .. واكون عينك ..
أكون قوة في دراعينك ..
مش انت تاخد لي في القرارات .. وانا اللي امسح بإيدي دَرَاك ..
ما تتلككش بالناس اللي بيعارضوك .. ما تتشتتش .. ما تتسوحش ..
بلدنا عايزة ريس وحش ..
يسمع نقده بودانه .. ما يتكبرش ..
يكون جبار على الظالمين .. رحيم بينّا ..
ينام بينّا ويقوم بينّا ..
يمشي يعسّ في الشارع على الجعانين ..
ويفهم إن في الشارع شباب ثايرين ..
ما لحقوش يبقوا كارهينك .. فما تزوّدش نار الكُره في قلوبهم ..
شباب شايف فلوس بلده .. مش بتخشّ في جيوبهم ..
ما تخدعناش ببقين من بتوع (حسني) يا مولانا ..
وِرِمْنا كلام وصدّا من الغُـنا قفانا ..
ما تدبحليش حمامة يتيمة على عينها .. وتقنعني انه ديك رومي ..
ما تلعبش انت في المية .. وتمسح إيدك المبلولة في هدومي ..
ومش كل لما توعد وعد .. تطلع بُق ..
ما تشِدّش فرامل اليد .. وتطلب من أنزل ازُق ..
ولما الناس تكون ثايرة ومختلفة .. ما تخطبليش في أتباعك ..
ولما تكون مع وزيرة .. ما تلعبليش في دراعك ..
ولا تسمعني ولا أهلي ولا عشيرتي ..
وخيري يبقى لولادي قبل ما ابص على جيرتي ..
بلدنا حواض من البركة بعمر النيل ..
بلد دفيانة بالقرآن وبالإنجيل …….

(منقول) للعلم هذه القصيده اثارت الجدل وتم الرد عليها


قصيدة "أنا إخوان " لآية علاء

قبل قرأة القصيده هذا الكلام بالاسفل بقلم اية علاء

اعتقد الجخ بمعلوماته الشحيحة عن الإخوان و فهمهة الأكثر شحا و سطحية أنه بقصيدة يستطيع أن يفت عضد الإخوان ..

و نسى أو تناسي انها دعوة و جماعة بعمر 10 من أقران عمره .. لم يبليها الزمن .. و لم يواريها غبار الأشعار من عينة قصيدته .. أذكره ببعض ما كنا و لازلنا و سنظل عليه .. فى كلمات تقف عاجزة امام جلال التضحيات و عظم المبادئ ..

و لا أنسى أن اسال الله لإمامى الشهيد حسن البنا الفردوس الأعلى مع النبيين و الصديقين و الشهداء ..

أنا إخوان ..

و قبل ما تيجى للدنيا ..

أبويا سابنى فى اللفة ..

و اترحل على الليمان ..

و داق فيه العذاب ألوان ..

ماهو إخوان ..

و أمى كات تحضر شنطة مركونة ..

و فيها فانلة و صابونة ..

و باكوا حلاوة منسية ..

لزوم السجن و الحرمان ..

ماهى أمى كمان إخوان ..

و لما كنت مدفى فى حضن أبوك ..

أنا على الأرض كنت أحبي ..

أشوف من تحت عتبة أى باب مسكوك ..

أدور لما أخدوا أبويا على حضنه ..

و يحوشنى البعاد عنه ..

و يحرمني ظلام السجن منه حنان ..

ما ذنب طفولتى إن الأسرة دى ..

إخوان ..

و لما الباب يخبط كنت أنا بخطي ..

أقول بابا و من شوقى أقوم أجري ..

و يلقفى دراع أمى .. و تخضني ..

تقول سافر بقالة زمان ..

و راجع عن قريب بالحلوى ..

أو بلبان ..

و صبر أمي يا غافل ..

تربية إخوان ..

أنا أوعى على أسرة أبويا كل يوم اتنين ..

و ترحيبة بإخوانة و قول أهلين ..

و أوعى على حلاوة صوته فى القرءان ..

و على فكرة ..

عشان يمكن ما تفهمشى ..

دية أسرة الإخوان ..

أنا الى لما كنت انت ..

بتسكت ع الحقوق ساكت ..

و مصر القهر ركعها ..

و من جبنك كتير شافت ..

أنا كنت أمشي فى مسيرة ..

حيطان الجامعة عارفاها ..

و فاكراها ..

أقول "لأه" لظالم حط ع هناها ..

و لا أوافق على تزوير ارادتنا ..

و لا تعديل بنود تهدر كرامتنا ..

و أهتف ..

غزة دى مني ..

أشيلها فى حنايا الروح ..

و أدارى عليها بالنني ..

أفديها من الغاصب و م الخوان ..

مانا فى الجامعة يا بختى ..

شرفت بطلبة الإخوان ..

و لما مصر حنت للكرمة بجد ..

و اشتاقت ترفرف فيها راية المجد ..

أنا فى أول صفوف الثورة كنت الجند ..

و دمي روى ميادينها ..

و صوت أنا مصري بتجلجل فى تحريرها ..

و صحبة كنا بنبيت فى عز البرد ..

و سيدك الى مش عاجبك ..

من قبلي و من قبلك ..

على دا العهد ..

مبايع ربنا و حافظ كتابة عشان..

بضاعته مش ورق صندوق ..

بضاعته جنة الرحمن ..

ماهو مرسي رئيسك ..

غصب عن عينك ..

متربي مع الإخوان ..

حزينة على ضياعك بدري فى السكة ..

طريق الدنيا من غير دين ..

كله بهدلة و عكة ..

و سبحان الى فرقنا ماهو شتان ..

ما بين الى ارتضى العتمه ..

و بين الى مشي فى سكة الأوطان ..

ينور ليلها انجازة ..

و تبقى حبيبته ..

تاج راسه ..

و دعمي ليه بكل محبة و اطمئنان ..

و من الأخر ..

أنا إخوان ..

السلام عليكم
حقيقة أعجب كثيرا من ناس يعممون في حكمهم فيصير خطأ الفرد خطأ للكل
فيا ترى ما تقولون في خير الناس بعد الأنبيا عليهم الصلاة والسلام وهم الصحابة ؟
أفاضل صح ؟
طيب هل عرفتم أن منهم من أخطأ أم هم معصومون ؟
هل نقول الصحابي أخطأ أم كل الصحابة ظ
لكن الفارق أن المخطئ منهم يسارع بالتوبة وسائر إخوانه يستروه ويعينوه أما نحن فنذبح المخطئ بسيف القلم ونشهر به في الإعلام ولا نقبل منه عودة لسبيل الرشاد إن عاد ونجعل الكل مثل الفرد في الخخطأ ولا نشكر في حال الإحسان
إلا من رحم ربي طبعا