يابو رعد عيّت الأيام تصفالي
وعيّت تبلغني أغلى ما تمنيته
واسقتني المرّ واسقت غيري الحالي
من غير مااعرف وش الذنب اللي سويته
واليوم جتني تخبّرني عن الغالي
اللي أغليته من أعماقي وحبيته
واللي بنيت إله بأقصى القلب منزالي
واللي بكلمه ياروح الروح ناديته
واللي حسبته نهاية كل آمالي
ورجائي اللي معا بعده ترجّيته
جتني تقول العوض في عمرك التالي
ولا عاد تتذكر العمر اللي أفنيته
ألا يازين عيني مـا بقـا فيهـا لغيـرك شـوف
تشوف الناس في صوتك وفي صورتك مخلوقين
لحد إني أهرّجهـم واشوفـك جـازع ملهـوف
تطالعنـي بعينـك وآتلفـت بيـن حيـن وحيـن
وصورتك بعيوني صارت أكبر من جدار الخوف
تتيه بلونهـا الزاهـي وتلفـت أعيـن الماشيـن
ومن خوفي لا يبصرك ويعرفك واشيٍ مكشـوف
أغمّض وأحضنك برموشي وبرضي أخاف تبيـن
لكنك ما ولا مـرّه ذكـرت الوالـه المشغـوف
وجاملته بكلمـه أو ولـو حتّـى بنظـرة عيـن
وأشعرته بذرّه من حنانك يا أهيـف السرجـوف
تعيد له الأمـل وترجّعـه فـي عالـم الحييـن
وش اللي بدّل أفكارك وغيّـر طبعـك المألـوف
وبدّل صورة الماضي الجميـل وغيّـر التلويـن
وش اللي رخّص الغالي وكنسل شيكه المصروف
وأخبرك إن مـا عنـده رصيـدٍ يوفـي التدييـن
وش اللي قالوا إلك الناس من شعرٍ بدون حروف
يحـرّك دقـة الوجـدان ويغنّـي بـلا تلحيـن
لحتى أنك نسيت المعرفه يـا لابـس المكلـوف
وهدّيـت بدقيقـه مـا بنينـاه بثـلاث سنـيـن
ولا بينت لي كرهك ولا أخفيته عـن الملقـوف
بيـن البينيـن تلعـب اللاعـب علـى الحبليـن
فرجاي إن كان باقي عندك إنسانيـه ومعـروف
تريّح طرفي الساهـر وترحـم قلبـي المسكيـن
ان كان حبك لي على شان ثوبي
فيشهد الله انك اعمى بصيره
بيت تغنت به فتاة الجنوبي
واثار في نفسي حاجات كثيره
وخلاني اجنب كثير الدروبي
اللي بها قدام احث المسيره
واراجع احسابات حب كذوبي
واعرف طبيعة شكله المستديرة
اللي بها طالت ليالي هروبي
عن واقع الواقع بشره وخيره
وخلاني اطوي الشرق بايد الغروبي
واطول ايام الحياة القصيره
وابصر واميز صوب ماهو بصوبي
واريح اعيون من اول سهيره
وازعل اللي من الفرح سولفوبي
واللي يلدون ابعيون كسيره
يوم ان لعب بالقلب غض لعوبي
واقنعني ان حبي تملك ضميره
وانه لو ابعد مجبر ومغصوبي
ولا يقدر يخلف نظام العشيره
وفي لحظة غير مهب الهبوبي
وفي لحظة غير غرامه بغيره
وزيف الحقيقة مزقته العيوبي
وثوب الخديعه غطى سلكه حريره
وبان ان حبه لي على شان ثوبي
وما عاد لي الا اقول يالله الخيره
ليه تبكي وأنت في يوم عرسك يا قمر
طبعا من كثر الفرح ولاّ ما فيه أي سبب
يجعلك تمطر بدمعك على الورد الحمر
وما تخاف الورد يلحقه من دمعك عطب
أحذر أتقول أن ما فيك هو همّ وكدر
أبسبب هاليوم واليوم عمره ما أنحسب
في حياة أنسان ما يحس احاسيس البشر
وكل همّه أنه يملّي أيدينه ذهب
وانت جافي طبع وفؤادك اقسى من الحجر
وميت الاحساس وارق مافيك الغضب
صحيح كل اللي تقولينه اصحيح
والباقي اللي ما حسبتي حسابه
يوم الجمل يعثر على الدرب ويطيح
وتكثر سكاكينه وتكثر حرابه
وجور الزمان يبيح الصبر ويبيح
وكل يشرع للاشاعات بابه
ويصبح حديث الشمس وحكاية الريح
ويكسيه سحاب الشلايا ثيابه
والحظ لعبة والاوادم مراجيح
والموت واحد والطعون اتشابه
وما في العيون الا دموع التماسيح
وما في القلوب الا سواد الكتابه
ولا منها غفت عيون المصابيح
سهرت انا واياك عشق وصبابه