تورتة النسكافيه من مطبخ الشيف مونى بالصور 2024.

السلام عليكم ورحمة الله
كل عام وانتم بخير بمناسبة العام الهجرى الجديد
ربنا يجعله عام خير علينا جميعا ويحفظ بلادنا من كل سوء ويفرج كرب سوريا
النهرده ان شاء الله هقدملكم تورتة بسيطة وسهلة وهى تورتة النسكافيه
اولا بالنسبة للكيكات الاسفنجية وليها 3 طرق
الطريقة الاولى وهى الطريقة التقليدية وهى اننا بنفصل بياض البيض عن الصفار وبنقلب العجينة بخفة وندخلها الفرن بالراحة عشان متهبطش وطبعا الطريقة دى غير انها صعبة وبتاخد وقت كتير كمان مش مضمونة ولما بتنجح الكيكة بتكون ناشفة من جوة وبتحتاج اننا نحطلها سيرب او مربى عشان نطريها
الطريقة التانية اننا نحط محسن جيل على خليط الكيك ودى اضمن واسهل من الطريقة الاولى ومش بنفصل فيها البياض عن الصفار وبتنجح مع ناس كتير بس بردو فيه ناس مبتنجحش معاهم والكيكة بتهبط منهم من المنتصف لسببين الاول ان المحسن بيكون قديم والتانى بسبب حرارة الفرن
الطريقة التالته ودى اسهل واضمن طريقة وكمان احلاهم طعما وهى اننا نستخدم دقيق الاسبونش الجاهز وده بيتباع فى محلات خامات الحلويات وممكن عند العطارين الكبار وبنضيف للدقيق المياه والبيض فقط وبتطلع الكيكة هشة وطرية من جوة ومرتفعة ومش بنحتاج نحطلها سيرب او مربى لما بنقسمها ودى الطريقة اللى بستخدمها دايما وعملت بيها التورتة اللى هقدمهالكم النهارده
مقادير الكيكة:
نصف كيلو دقيق اسبونش(وزى ماقلنا دقيق الاسبونش بيكون مضاف ليه السكر والفانيليا والبيكنج بودر)
5 بيضات كبار
نصف كوب مياه
مقادير الكريم الشانتى
نصف كيلو كريم شانتى خام
نصف كوب لبن بودرة
ماء مثلج
10 معالق كبار سكر بودرة
معلقتين كبار نسكافيه متدوبين فى شوية مياه
مقادير صوص النسكافيه
قطعة كبيرة زبدة(حوالى 100 جرام)
2 معلقة كبيرة نسكافيه
نصف كوب سكر
2 ملعقة صغيرة جيلاتين بودرة
نصف كوب لبن
وللتزيين
فستق مجروش
ملبس الوان
طريقة الكيك
هنحط دقيق الاسبونش فى بولا ويفضل يكون بحرارة الغرفة

ونضيفله البيض والمياه وبردو يفضل يكون البيض بحرارة الغرفة

ونضربهم بالمضرب الكهربائى لمدة من 7 ل10 دقايق على اعلى سرعة

ونحط خليط الكيك فى صينية مدهونة ومرشوشة بالدقيق(الصينية مقاس 24)

ونخبزها وطبعا كل شخص فرنه بيختلف عن التانى عشان كده مش بكتب درجة حرارة الفرن
وطبعا هنختبرها قبل مانطلعها وانتو شايفين اثار الاختبار بعد ماطلعت من الفرن

ونقلبها على ورق زبدة

ونحفظها فى التلاجة لمدة يوم كامل
ولما نطلعها اليوم اللى بعده نجهز أدواتنا اللى هنقسم بيها الكيكة ونفرد بيها الكريمة

ونقسم الكيكة ل3 طبقات

ونجهز كريم شانتى النسكافيه

ونبدأ نحشى الكيكة

ونغلف الكيكة بالكريم شانتى

وندخلها التلاجة لمدة ساعة
ونبدأ نجهز صوص النسكافيه
هنحط كل المكونات مع بعض طبعا بعد ماندوب الجيلاتين فى شوية مياه

ونحط عليهم اللبن

هنسيب كل المكونات دى على النار لغاية ماتغلى وبعد كده نضربهم فى الخلاط ونصفى الصوص ونسيبه يبرد
(وللأمانة كريم شانتى النسكافيه وصوص النسكافيه اتعلمتهم من واحدة صديقتى)
هطلع الكيكة من التلاجة وابدأ ازينها واحط عليها الصوص
وده شكلها بعد التزيين


ودى شكلها من جوة بعد ماقطعتها

وبأمانة لازم اللى بيحب النسكافيه يجرب التورتة دى لأن طعمها ونكهتها وكل شىء فيها نسكافيه
يارب موضوعى البسيط ده يكون عجبكم