سار القلم يكتب بيوت بتدوين * يكتب بيوت الشعر من دون زله
يقول ويعد الصحيح براهيين * ويترك دقاق الهرج ويجب جله
يوم اعترضلي واحد ملبسه شين * كنه نقدني وانا ناقدله
قام يتلفت في ويقول من فين * لاني غريب ولا ارتضي بامذله
من عزوة ينقال عنا شدادين * اهل الوفا وافعالنا مستقلة
وقفاتنا تعرف بوسط الميادين * والسيف في وجه المعادي نسله
عز الخوي والجار سقم المعادين * زبن الدخيل ليا جرى له تعله
اهل الكرم في ساعة الضيق قاسين * ولو قلت عنهم ماأوفي الحق كله
يفرح بنا من راح ذوده قطاعين * لاصار يوم مااحد حاسب له
ومن طبعنا نحول دون المساكين * لادارت صدوف الليالي بعله
لاماتخاوينا ترانا نزيهيــــن * يالي تمس الجنـــز وتقول يله
نمشي على منهج جدود وسلاطين * مانقلد استعمار والامجلة
نلبس لباس العز ونعيش ذربين * رح خبر اللي فصل الجنز قله
يااللي تقلد للخواجات ذا الحين * اللي سواتك وش هو عايش له
تركت درب الناس تمشي على وين * همك من الدنيا بوقتك تفله
تمشي يسار ومنهج جدودك يمين * تغوى الطريق ولنت قادر تدله
تبغ النصيحه ياسفيه الذراعين * الجنـز والمكيـاج والشـرت خله
هذا جوابي وانت بديت بالسين * وشرواك بعض القول مايحتمل له
اليوم ياذيب العيال محكومين * منهج وقانون وشرع ومله
لكن فارقنا ترانا مقفين * ترى كلا مك ماحد سامع له
ياحي مرباع البدو منحين * في محل ماكل شخص وصله
وياحي ذود حلبت في الموازين * وراع القنص ماحد فطن له
وياحي دن النجر والكيف كيفين * دله بمركاها ويدور دله
ومن بعدها يدني خروف وسكين * والنار تقهر والقِدر مركب له
في بيت عز وبه ناس عزيزين * بيت الشعر ماهو بحوش وفله
تلقى الصراحة مع ناس صريحين * ويرحبون ان جات وجيه مطله
في ديرة ماسيروها الخبالين * جاه الحيا من مزنة مستهله
ربي عطاها لين سارت بساتين * رحمان كل مستظل بظله
تسلابها لوهي همومك ملايين * وسوالف ماهي بسواليف شله
هذه طرات الروح ياابن الشجيعين * ولا الردي بيموت وهو بغلـه
مع تحيات:الشــدادي
الله يعطيك العافيه
بصراحه قصيده رائعه مشاكس
تسلم ويسلم غاليك
لك مني فائق الاحترام
تقبل مروري وتصويتي
بصراحة والنعم بالحرث
ولك مني خالص الأحترام والتقدير مشـــاكـــس
مع تحيات/ مشاغب
وأهنيك على التمسك بالعادات والتقاليد
يا مشاكس
مع تحيات/ مشكلنجي