عطني من اللي تقعد الراس فنجال
فنجال دله يقصـر النقـد عنهـا
ابغى اتهيض واتمثـل بالامثـال
واحط برقاب الصعايـب رسنهـا
سرابي الهاجس على كـل مـوال
هـذي يـبـينهـا وهـذي دفنـهـا
خذها على كف القدر فال وعقـال
من واقـع افـراح الحيـاة وحزنهـا
قتال يـا هـم الرجاجيـل قتـال
يوم اقبـلت خيـلك تسابـق زمنهـا
اوهام واحلام وطموحات وآمـال
ندفع على وجـه البسيطـه ثمـنهـا
من كثر ما ندور على راحة البال
ما عـاد نـدري وين يمـة وطنهـا
صرنا نقدس عظمة الجاه والمـال
ونضيع فروض الصـلاة وسـننهـا
والخاتمه يوم نتغطرس ونختـال
ارقـابنـا تـنسـاق للـي رهنـهـا
هذا الكلام اللي من الواجب يقـال
عنه الـغرور اعمى القلـوب وفتنهـا
كان الطمع له قلب الانسان ميـال
نـرمي علـى وجـه القناعـه كفنهـا
نور الصباح يبدد الليل لـو طـال
ويـشرق على شـام الـبلاد ويمنهـا
ياللي تهمك معرفة بعض الاحوال
جـتك المصادر واعـرف العـلم منها
الكوكب اللي منقطع عنه الارسال
بيـنه وبين الارض واللي سكـنهـا
حطت عليه رحالها اقـدام رجـال
رحـلة ذهـاب وعودته ما ضمنهـا
بعيد عن حب المظاهر والاشكـال
قـريب من بـوح النفوس وشجنهـا
وان كبرت براسه تبي تصغر جبال
وفي كـف ميزان العـدالـه وزنهـا
قصيده رائعه من إنسان رائع