قراقيش بالعجوة وبالملبن من مطبخ الشيف مونى بالصور 2024.

السلام عليكم ورحمة الله
كل سنة وانتوا طيبين
ده اول موضوع يخص حلويات العيد ان شاء الله
والمكونات كالتالى:
كيلو وربع دقيق
4 كوب زبدة
2 وربع كوب حليب
2 ملعقة كبيرة شمر وشبت وينسون مطحون
2 ملعقة كبيرة بيكنج بودر
نصف كوب سكر
بيضة وفانيليا لدهان الوجه
سمسم للوجه
للحشو:
عجوة
ملبن
الطريقة:
اول حاجة دى صورة الشمر والشبت والينسون مطحونين

هننخل الدقيق ونقدح الزبدة وننزل بيها على الدقيق

ونقلبهم مع بعض كويس احنا بنقول فى مصر نبس العجينة عشان الدقيق يشرب كل كمية الزبدة

ونسيبها تبرد خالص ونضيفلهم السكر والبيكنج بودر والشبت والشمر والينسون المطحونين

ونقلبهم مع بعض كويس

ونضيفلهم الحليب

ونعجنهم كويس جدا لغاية ماالعجينة تبقى كتلة واحدة

ونسيب العجينة ترتاح لمدة نص ساعة ونبدأ نشكلها
هنجيب جزء من العجينة نفرده على شكل مستطيل ونبرم بايدينا قطعة عجوة ونحطها فى النص

ونفس الطريقة هنعملها مع الملبن

ونلف المستطيل ده على شكل رول

ونقطعه

فيه طريقة تانيه وهى اننا ناخد قطعة كبيرة من العجينة ونفردها بالنشابة ونحط عليها قطعة كبيرة من العجوة او الملبن نفس حجمها او اقل حاجة بسيطة

ونحط عليها قطعة تانى من العجينة نفس حجمها يعنى العجوة او الملبن تبقى فى النص ونساوى الاطراف بالسكينة

ونقطعها بالقطاعة اللى عايزنها هتدينا شكل جميل

ونرصها فى الصوانى وندهن وشها بالبيض والفانيليا ونرش عليها سمسم ونخبزها فى فرن حرارته عالية ونكون مسخنينه قبل كده
وده شكلها بعد ماطلعت من الفرن


يارب موضوعى البسيط ده يكون عجبكم

تسلم ايديك شاف
وصفة من وصفاتك الرائعة والسهلة لي راح اجربها
تحاياي لك

مشكوره ياقلبي على الموضوع والوصفه سهله