لا انا نقصان ولا ضعفان
ولا مسطول ولا سكران
ولا زايغ من عيني الضيّ
ولا حد احسن مني في شيّ
بس بغير
واللي قالولك غيرة الراجل قِلّة ثقة او قلة فَهم
خَلْق حمير
غيرة الراجل نار في مَرَاجِل
نار بتنوّر مابتحرقش
واحنا صعايدة بنستحملش
شمسنا حامية وعِرْقنا حامي وطبعنا حامي
واللي تخلّي صعيدي يحبها
يبقى يا غُلْبها
اصلنا ناس على قد الطيبة
كلنا هيبة
والنسوان في بلادنا جواهر
طب لو عندك حتة ماس
حتخلّيها مداس للناس؟؟
ولا حتقفلي اوضة عليها بميت ترباس
يمكن حتى تأجري ليها جوزين حراس
يبقى انا لا انا جاهل ولا غافل
كل الفرق ما بيني وبينك اني صعيدي
………………………
………………….
……………………..
لو كان بايدي
كنت اعملك هندي بريش
واقلب شعري كنيش كرابيش
والبس لك سلسلة متدلدلة خرزة وقلب
بس ازاي البس لك سلسلة ؟؟ هو انا كلب ؟؟
ثم العبرة ماهيش في اللبس
اصل المشكلة عَندك .. عٍندك ..
قلت حاسيبها وبكرة تحس
بعده تحس
بعده تحس
ده انا لو جبس كنت زعقت
………………..
بس ماجَتْش على الرجالة
ماهي نسوان الدنيا كتير
وانا ما بقولش تخاصمي الناس
ولا تِتْحِجبي عن الرجالة
ولا تعتكفي وتسكني دير
بس يا ريت حبة تقدير
اني بحبك
واني بريدك
واني زرعت حياتي في ايدك
واني غزلت بنات الدنيا عقود على جيدك
واني تعبت من التفكير
واني بغير
شعر هشام الجخ
اخـتـيـار لـطـيـف مـن شـاعـر لـم نـعـرف عـنـه سِـوى
كـل شـيء رائـع و كـل شـيء فـيـه غـيـرة سـواءاً
عـلـى الـوطـن و عـلـى اخـوتـه الـعـرب ،، و حـتـى
عـلـى حـبـيـبـتـه ،، اسـتـمـتـعـت بـالـقـراءة ،،
سـلـمـت أخـي و سـلـم ذوقـكـ فـي الانـتـقـاء ،،
شكرا لمرورك اخت خلوود
واشعار الجخ متميزة حتى من قبل الثورة بجراتها واسلوبه بسيط ومؤثر
الله يبارك فيك
شكرا لمرورك اخت اروي
فعلا اغلب قصائد الجخ تتسم بالجمال والواقغية ومعالجة الاوضاع التي نعيشها
بارك الله فيك