بارفيه البطاطا الحلوة من مطبخ الشيف مونى بالصور 2024.

السلام عليكم ورحمة الله
احنا فى الشتا والبطاطا الحلوة مالية السوق واحنا دايما نشويها او نعمل فطيرة بطاطا فحبيت اغير واعمل بالبطاطا صنف جديد وللأمانة انا اتعلمت الوصفة دى من الشيف/نرمين هنو ةالصنف ده طعمه حلو وطريقته سهلة
مكوناته كالتالى:
نص كيلو بطاطا حلوة
لتر حليب
ملعقة صغيرة فانيليا
3 ملعقة صغيرة جيلاتين بودرة(بيتباع فى محلات خامات الحلويات او عند العطار)
4 ملعقة كبيرة ماء
30 جرام سكر(ملعقة كبيرة ونص)
50 جرام ماء(2 ملعقة كبيرة ونص)
ملعقة صغيرة لون طعام برتقالى(اختيارى وممكن نستغنى عنها)
2 كوب كريم شانتى خام
كوب وربع حليب بارد
5 ملعقة كبيرة سكر بودرة
وللتزيين:
وردات كريم شانتى
فستق مطحون
(او حسب الرغبة)
الطريقة
هنقشر البطاطا ونقطعها مكعبات ونحطها فى كسرولة

ونحط عليه لتر الحليب بس طبعا هنكون غليناه قبلها بمدة

ونشغل عليها نار هادية لغاية ماتستوى وبعدها نطلعها نصفيها من الحليب ونحطها فى اناء ونهرسها

ونحط عليها كوب من الحليب اللى سلقناها فيه مع رشة فانيليا

ونحضر السيرب (السيرب هو الشربات او القطر) هنحط ال50 جرام ماء مع ال30 جرام سكر على النار لغاية مايدوب السكر وهنحطهم على البطاطا والحليب

وهنحط الجيلاتين مع الاربع معالق مياه على النار لغاية مايدوب وهنصفيه على البطاطا والحليب ونضيفلها لون الطعام البرتقالى وهنضرب كل ده بالمضرب الكهربائى

ومش هتبقى فى درجة النعومة اللى احنا عايزنها فهنضربها تانى فى الخلاط ونصفيها
هتبقى ناعمة جدااااااااااا ومفيهاش اى شوائب

وهنحضر الكريم شانتى هنحط كوبايتين الكريم شانتى البودرة فى اناء معاهم الكوب وربع حليب والسكر بودرة والفانيليا ونضربهم بالمضرب الكهربائى وهيبقى قوامه سميك شوية وده اللى احنا محتاجنله فى الوصفة وهنضيفهم على خليط البطاطا بالتدريج

ونقلب برفق لغاية ماتختفى كل تكتلات الكريم شانتى ويمتزج كويس مع خليط البطاطا وكده بقى البارفيه جاهز عندنا
هنحطه فى اطباق التقديم وهنزينه حسب رغبتنا
وده شكله النهائى

طعمه راااااااااائع وتحسوا انكم عايزين تاكلوا منه طبقين تلاته ورا بعض لأنه خفيف ومش بيتعب
يارب يكون عجبكم
بالهنا والشفا

تسلم الايادي شاف
الله لا يحرمنا من وصفاتك
تقبل مروري
تحاياي

معلومات رائعة و مفيدة
لا يحرمنا من عطائك القيم
ننتظرنك المزيد بكل شوق
تقبل مروري ولك ودي وردي