السلام عليكم ورحمة الله
اليوم ان شاء الله هقدملكم القطايف السورية
طبعا هى تفرق عن القطايف المصرية انها نية مش مقلية فى الزيت واعتقد ان مدينة حلب مشهورة بالأكلة دى (فرج الله عن سوريا واهل سوريا)
بس يمكن اللى يفرق ان اهل سوريا بيحطو دقيق سميد على عجينة القطايف وانا محطتش
اول شىء مقادير عجينة القطايف:
2 كوب دقيق ابيض
2 كوب ماء دافىء
2 ملعقة كبيرة سكر
نصف ملعقة صغيرة خمية فورية
نصف ملعقة صغيرة بيكنج بودر
ذرة ملح
مقادير القشطة:
علبة قشطة بوك(170 جرام)
2 كوب لبن حليب بارد
3 ملعقة كبيرة نشا
ملعقة صغيرة فانيليا(وممكن استبدالها بماء ورد)
وللتزيين:
بندق مجروش
عسل نحل
اولا هنعمل عجينة القطايف
فى بولا هنحط الدقيق والبيكنج بودر وذرة الملح
وفى بولا تانية هنحط الخميرة والسكر والمياه مع بعض ونخلطهم ونضيفهم على خليط الدقيق
ونخلطهم كويس جدا بالمضرب اليدوى(الويسلك)او الخلاط اليدوى الكهربائى لغاية مانتأكد ان مفيش اى كلاكيع فى العجينة
نغطى العجينة ونسيبها تختمر لمدة ساعة فى مكان دافى
ونبدأ نجهز القشطة
دى صورة لمكونات القشطة
هنحط الفانيليا والنشا على اللبن
هنقلبهم كويس جدا قبل مانحطهم على النار لغاية ماالنشا تدوب فى اللبن وهنحطهم على النار ونقلبهم لغاية ماالخليط يتكاثف ولما نطفى النار نحط عليهم علبة القشطة
ونقلبهم كويس لغاية ماكل المكونات تتجانس
هنحط القشطة فى التلاجة لغاية مانحضر القطايف
نرجع تانى لعجينة القطايف
بالنسبة لسواء عجينة القطايف طبعا لازم مقلاة غير لاصقة
وفيه ناس بيحطو العجينة فى المقلاة بالملعقة وفيه ناس بالقمع البلاستيك بس انا وجدت احسن حاجة واسهلها هو ابريق الشاى
هنملا ابريق الشاى بالعجينة ونغطيه طبعا
هنسخن المقلاة على النار قبل ماننزل عليها عجينة القطايف
طبعا هى مش بتاخد وقت خالص على النار لما تدخل فى السواء هتعمل فقاقيع زى الصورة كده احنا ماشيين صح والعجينة مختمرة
هنشكل العجينة هنقفلها عادى زى مابنحشيها ونقليها فى الزيت بس الفرق المرة دى هنقفلها وهى فاضيه وهنسيب ربعها مفتوح
ده شكلهم بعد ماقفلتهم قبل ماأحشيهم بالقشطة
وده شكل الطبق النهائى بعد ماحشتهم بالقشطة وحطيت عليهم البندق المجروش وعسل النحل
يارب موضوعى البسيط ده يكون عجبكم
تحيتي