مش عايزين مرسى بلاش
من حقكم إيه رأيكم
نعيدوا الانتخابات مرة تانية
إحنا تحت أمركم
ولا أقولكم وعلى إيه انتخابات
مش عايزين نوجعوا قلبكم
إيه رأيكم نلعبوا كيلو بامية
أنا ما بهزرش أنا بتكلم جد
هو ده مفهوم الحرية
ولا صندوق ولا انتخابات ولا شرعية
ويا ريت الناس تفهم القضية
ويا ريت كل واحد عامل وش
يتلم شوية
أنا عايز أفهم يعنى أقطع طريق
ويعنى إيه مليونية عند الاتحادية؟
أنا عايز أعرف يعنى إيه سحب الثقة من مرسى؟
هو فى حاجة اسمها سحب ثقة؟ وإيه هى الثقة؟
ويا ترى إحنا فى ما بينا وبين بعض ثقة أصلا؟
طيب ليه الفلوس اللى بتتصرف على سحب الثقة
وإسقاط مرسى ما تتصرفش على الغلابة والمحتاجين؟؟
ولا أنتم إيه رأيكم يا مصريين
يمكن ساعتها ترجع الثقة ما بينا
وبين بعض بدل ما حياتنا
كلها كدب فى كدب وتمثيل فى تمثيل
أنا مش ضد التمرد ولا المتمردين
بالعكس أنا معاكم
وف قلبى شوق وحب وحنين
يكفى كل العاشقين والمتمردين والحالمين
أن مصر تبقى لكل المصريين
بس خايف بدل ما تكونوا بتتمردوا
على مرسى والإخوان
تكونوا بتتمرودا على مصر وأنتم مش عارفين؟
وإيه أخرتها والطريق ده ها يودى على فين؟
ويا ريت كل متمرد يكون عنده إجابة ومن غير فلسفة
ومن غير ما يعمل فيها أبو المناضلين
أنا عايزك تقولى الكلام ده ها يفيد مين؟
طيب ليه ما تشتغلش على الأرض
طالما معاك ملايين
وتاخد مجلس الشعب
من الإخوان والإسلاميين
إيه رأيكم يا متمردين؟
طريقة إسقاط مبارك ما تنفعش مع مرسى
فرق كبير بين الاتنين؟
ولازم تكونوا عارفين ؟
كفاية خراب فى البلد يا مصريين
وإوعوا تنسوا أن الغلابة هما اللى شايلين الطين
يا ترى حد يقدر يقولى البلد رايحة على فين
الشاعر
عبد الحميد بدوى