الوسم: الكون

وينكم ياربع عمري ؟ من بقى ما صك بابه؟
مابقى لي صاحبٍ أرمي عليهـ اهوَن حمولي

الكتابه عن همومي ذنب أفْشَـل في ارتكابه

هكذا حزني أناني … غير فرْحي لـ الّلي حولي

من هموم الناس أبني دافعي لـ أجل الكتابه
ما حسَبْت حساب ضاقوْا بْما كتبت او صفّقوا لي

كم كتبت وقيل تكفى .. هذا شي ماينحكى به
مو بـ كيفي صرت وابل تُرتقب لحظة هطولي

ما تعبت ارقى و أرقى بـ الدُّعا حالي تشابه
مقدر انزِل لو أبنزل غصب ترقابي رجولي

لي إلهٍ جلّ شانه عندْ ما اكون فْـ رِحابه
في ركوعي في سجودي أصْعَد فْـ قِمّة نزولي

لي مكانٍ في الكواكب ذا طموحي لسْتُ آبَه
نجم عالي ذا مكاني عل موتي هو أفولي

باقيٍ يادنيا شعري يملئك فخر ومهابه
قد يزول فـ يوم آتي عندما أنتي تزولي

أنتسبت لـ جد معجز دين وعزوم وصلابه
هو أخو نوره معزي تبطي جداً ياذبولي

ولي أبو ماشفت مثله مُحتسب مهما أصابه
كل زهدٍ غير زهده مُفتعل وهمي وصولي

عندي أمٍ مستحيله طيبها صعب أجتنابه
آهـ يمه كم أحبك في شراييني تجولي

ولي وطن أحيا لـ عزه أفتدي ذرة ترابه
مسلم سعودي عروبي .. ذي فروعي وذي أصولي

ولي شقيقٍ ماني أقوى نبرة الحزن فـ عتابه
كيف عاد ان كان يزعل ؟ أحترق من فرط هُولي

ولي ولد عمٍ غمرني فضله وسرت فـ ركابه
شفت له في كل لحظه فزعه وموقف رجولي

ولي حبيبه مستديمه حب عمري من شبابه
مالي فصول ومواسم وحدها بس هي فصولي

أم قلبينٍ بـ جوفي .. هم بعد كل القرابه
هم سبب سعدي ومجدي هم سبب خوفي وجفولي

ما فعلت الخير أرجي من بشر فاني إثابه
عالمٍ ربّي بـ قصدي و ما سبَبْ أطيب فعـولي

إن بغيت أعطي فـ أعطي فوق ما أقوى أكتسابه
رزق باكر , هم باكر .. إهتمامه لست أُولي

ماأفكر في عواقب جور وقتي وأنقلابه
أوثق بما عند ربي صعب عن هذا عدولي

جلّ خيرٍ قد فعلته كنت في عكسه أُجابه
لم يفاجأني جحود ولم يثر حتى فضولي

يازماني قبل غدرك كنت اقول الدنيا غابه
يازماني بعد غدرك مانقص مازاد قولي

أربعيــنٍ من تجارب أربعينٍ من غرابه
أربعينٍ من تأمُّــل شكّلت ذاتي و ميولي

الكبر أردى الخطايا ماتجبه أستتابه
أستعيذ بـ ربي منه في خروجي في دخولي

كلّ احَـد يقضي حياته بين تقصير و إنـابه
يستحيل انّك تلاقي لاْيّ اْحَد وصفٍ شمولي

شفت في الدنيا مهازل تُفقد المدرك صوابه
يفخر الكافر بـ كفره تُشتم بـ قولة ( أصولي )

النفاق اكبر رموزه كان في عهد الصحابه
كيف عاد الوقت هذا ..؟ كل شبرٍ به " سلولي "

الرضـوخ أصبح فضيله و قول " لا " أصبح دُعابه
و المشاكل مُبتدعها قال : تِلْزِمْكــُم حلولي

كيف تغيير المعاني يُرجع الحق لـ نصابه
والثوابت مستباحه عند ذول وعند ذولي

كل حق دون قوه زاهق وثابت ذهابه
يُكتب التاريخ ناصع لـ القوي لو هو مغولي

العدو بـ الحيل قرّب واضحٍ تكشير نابه
وبعضنا لازال يسأل ظنكم اسرج خيولي!

بين تفريط و تطـرّف تاه جيلي في خِطابه
خير اموري هو وَسَطْهَا طال عن هذا غفولي

إحترس يا ذيب و احذر من زمن سادَت كلابه
الوفا بَه صار عِجْبـه !! و الغدر فعلٍ بطولي

لا تثـق بـ الّلي تثــق به بد شكّك و ارتيابه
كم عُهُـرْ سافِرْ يُغطّى بْـ ملْمَحٍ طاهـر طفولي

عندي لـ الدنيا سؤال و ما أبي منها إجــابه
هو يغيّر شي رفضي .. أو حيادي .. أو قبولي ؟

كـن يا دنيــا همومك جُمِّعَت مثل الذّيابه
سالـَمَت كل الّلي قبلي تنتظـر لحظة وصولي

كلّ غدرك ما يساوي في مــوازيني ذبــابه
ربّما لوّك وفيتي كان أرّقْني ذهولي

يا عذولي هاك بوحي هاك جرحي و انسكابه
ما سوى ذا وقت سانح قم بـ دورك يا عذولي

أتعبتني هالقصيده .. فكر و جروح و رتابه
بس يا هذي القصيده .. أقصريها لا تطولي